By Zenbucucciu
L’accademia svedese hà datu u premiu Nobel di leteratura à u canterinu americanu Bob Dylan. Aviamu digià salutatu u so talentu : Bob Dylan in Tavagna. Eccu torna parechje belle ragiò di ralegravvi s’è vo avete u spiritu folk.
1) Bob Dylan scrive canzone, una puesia pè l’orechje in la grande tradizione antica di u pueta cù a lira. Puderia dì » Sò Dante cù una ghitarra » cum’è Lou Reed a dicia.
2) Bob a fattu soia a tradizionne di a canzona pupulare americana folk o blues ma hà sappiutu insità u vechju arburu ch’ellu dessi fiori novi, originali, persunnali è qualchì volta stranissimi. Hà mischjatu Omeru è Woody Guthrie, Jack Kerouac è Robert Johnson. Hè un mudellu di riacquistu.
3) Hà sapiutu esse indiatu… ma hà prestu ricusatu u rollu di prufetu dicendu » scrivu canzone micca sermoni. » o » I’m just a guitar player » (ùn sò ch’è un sunadore di ghitarra).
4) Hà ghjuratu di girà senza fine cum’è un veru » hobo » (stà à pusà ùn li piace mancu appena) . A sera stessa di u premiu cantava in Las Vegas. Un tippu chì lentà e so rime pè sti casinò/cabulò ùn pò esse gattivu.
5) Face cacà tutti quelli chì volenu staccà u nobile è u populare, l’altu è u bassu, a paghjella è Monteverdi, a puesia orale è quella chì dorme innù i libri, e lingue maiò è l’altre…
6) È pè compie l’affare, Bob Dylan canta cum’è s’ellu avia ingullitu una capra è e capre sò e nostre amiche.
Avemu quantunque una ragiò d’esse inchieti : Bob hà da stà mutu ma BFM hà da risuscità centu vechji hippie chì sonanu di l’armonica.
U trailer di u filmu di Martin Scorsese : No direction home
http://www.apiazzetta.com/video/
Source:: Premiu Nobel à Bob Dylan : sei belle ragioni di sciaccamanà (è una d’esse inchieti)